a[Ro 3:14]
Psalms 10
Te Godigo te dwai sę ebo bagego kolesag dagalamainu eyu, bidigo gedu haluasa po wali
1O Genuai Bidi, magi baso nage digibuludolalubawe?
Magi baso te dwai sę daba
pedalubo sogo nago dade geme duala sobawe?
2Te dwai bidi dabego te hagoma eyu,
tama te magi doado bage
meni yai bidi dabe pobeasa biliyu,
te augwali dolainu ebo da.
Augwa te gasa bidi dabe kalabus ilainu,
te nigali tǫ dedageba te augwa digi teba
tulolumainao.
3Te dwai sę ebo bidigo te aga ebo
dwai homu kolesagade hagoma homu eyu ebo dao.
Tama te hauwa nai wei eyu, pesa ebo bidigo agai
te Godiba dwai po weyu,
tama aga tudiba mudu gebo dao.
4Te hagoma ebo bidigo te tama po wabo da,
“Eno koneani, Godigo eno ebo dwai sę wei ponobeo.
Agai enade magi homu me egobeo.”
Te dwai sę ebo bidigo te tama homu eyu,
agai te Godigo ebo kolesaga wali pabo menio.
5Te agai yali sę tigidali, te wiegi yai pedalubo dao.
Agai te Godigo po tų yabode
te homu kone dwasianu me ebeo.
Agai te boi bidi dabeba
te posobo po weyu ebo dao.
6Agai te aga homude kone palama, tama te po weyu,
“Ena bomonama dolalubo da,” po wai.
“Te magi nai me deligo ena dwasianu me degelegobeo.
Te enade sęgę me gegegobeo,” te po wabo dao.
7Te sesemane sogo agai te gasa bidi dolomainu,
agai te i ola mabo po wabo dao,
tama tibo po me, te gasa bidi
wi ilibo po me weyu ebo dao.
Polo tama agai te dwai sę ebo kolesaga me,
te haniani sę yabo po mibo sę ebo dao. a
8Te bidi te bidibo be nani pesage
tomode geme dulaluyu,
tama te dwai sę isąwai bidi dabe asobo tonaluama,
tama augwali ela mubo dao.
Aga te geme dulaluyu,
tama te bomo meni yai bidi dolainu tonalubo dao.
9Aga te geme duala selama, tonalu,
te laion me deligo aga tǫ dedage
tomode tonalubo tiwai ebo dao.
Aga te geme duala selama,
te bomo meni yai bidi tola sainu tonalubo dao.
Agai te aga bono gągą haliga gebelama,
tama aga kegasa pabo dao.
10Te dwai sę isiąwai bidi dabe
mu dolama, tama pila mudali.
Te dwai bidigo genuai bomogo
te augwali aiyaba elalubo dao.
11Te dwai sę ebo bidigo te tama homu ebao,
“Godigo te sę ebode magi sę me egobe da,”
homu ebao. “Agai ena me sugobeo.
Agai te aga gedu panianio,”
dwai bidigo te tama homu ebo dao.
12Genuai Bidi, holaluao, nago aga elao.
O God, nago te sęgę tolobo bidi dabede
homu kone ebo me tagalugio.
13Te dwai sę ebo bidigo te God
tudiba muani, tama aga homude
te tama homu ebo dao,
“Agai te eno dwai sę ebo wei ponogobe da,” wabo.
Magi baso agai te tama po wabo dawe?
14Tiali goli, menio.
God, nago te dwai sę ebo bidi dabego
kolesaga subo dao.
Tama da gasa we bidi dabeba te sęgę me dene mabo,
te nago koneani,
tama nago da tau sainu sisi yai.
Te bomo meni yai bidi aga digi
te nage nogoba muani,
magi baso meni, te sesemane sogo
nago te magi nai meni yai bidi
tau sabo dao.
15Nago te dwai sę ebo bidi dabego
bomo silao.
Nago te augwa yali dwai kolesaga
deli deli wei ponama,
tama mu usu nao.
16Te Genuai Bidi te sesemane sogo
te king bidada peyu, bidada paibao.
Agai te aga po odisąbo Israel hani
isąwai bidi dabe
te aga tǫde ela gudulama,
tama augwali tede mu me bidigobeo.
17God, te nage dologoba
asobo we bidigo usu da weyu,
gedu haluasa po wabo te nago odao,
tama nago augwali homu dąų walao.
18Te nago te tiana wai dabe me,
te haliga sęgę elalubo bidi dabego me, te augwaligo
gela wabo nago odobo dao.
Te nago augwali tau selama,
te augwa po tųde te gasa bidi aiyaba elaluama,
buluba dią soaibao.
Tama tiyu, te dwai sę ebo bidi dabego
te augwali wi ma ilibaso, te usu me egobeo.
Te dwai sę ebo bage augwali te tǫde
osogo bidabo bage naga dao.
Copyright information for
MPS